Bilang

(Post is in Kapampangan. Will post a Filipino/ English version kapag sinipag. :) )

Metung. Metung ka kareng kaklase ku. E naka man pogi. E naka man masanting. Niyang mumuna da kang ikit e daka man pin buring lawen pero ngeni ika namu. Ika namung ika ing iisipan ku.

Adwa. Adwa nang banua mula niyang sinabi mung kaluguran(v) mu ku. Adwa ng banua niyang muna tamung mi uma. Adwa tana sang banuang mikakalugud ngeni nung emu ku likwan. Nung emu ku liwan. Nung.

Atlu. Atlung banua na kung magaral UP. Atlung banua na kung magaral Nursing. Atlung banwa da na kang kilala. Atlung banua da na kang kaluguran (n). 

Walu. Walu nang bulan mula anyang sinabi mu na emu naku kaluguran (v). Anggang ngeni manasakit ku pa rin patse iisipan ku na emu naku kaluguran. Anggang ngeni manasakit ku patse atin kang kayabeng aliwa, patse kukwentu mu kekami detang aliwang babayi na abuburyan mu. Ala kung agawa nung ali maki ayli namu at e papakit na apektadu ku parin. Walu nang bulan at mamasa ku na kaluguran (v) mu ku pa rin, na aku pa rin, aku namu ulit.

Labing apat. Labing apat na bulan tamu mung miyabe. Sabi da reng aliwa, dapat kanu emu bibilangan nung pilan kayung bulan miyabe pero asisi mu ku wari? Buri ku mu namang isipan ampo alalahanan detang masasayang panaun miyabe tamu.

Dinalan. Dinalan a beses na ku sigurung megmakalunus keka na magbalik na ka kanaku. Dinalan a beses mu rin sinabi mu na e naka magbalik, na para kaku mu rin ini. Dinalan a beses sinabi ku keng sarili ku na e da na ka kaluguran (v). Dinalan a beses sinabi ku kareng aliwang tau na okay na ku, masalese na ku. Dinalan a beses da kang ginagan. Maigit pa pin siguru. Dinalan a beses megsinungaling ku keng sarili ku. Dinalan a beses peglokwan ke ing sarili ku kasi balu ku hanggang ngeni kaluguran da ka pa rin. Maplas pero tutu.

Libu. Libung beses kung sinabi keka, kaluguran daka. Libung beses mu rin sinabi mu kanaku kaluguran mu ku naman. Libung beses din sinabi mu na e magbayu ing pamaglugud mu kanaku. Libung beses pegmaragul mu na keka ku, kaku ka. Libung beses sinabi mung malagu ku, na yaku mung kaluguran (v) mu. Libung beses ta na sigurung mipate. Libung beses na rin misabi ulit kasi mikalugud ka ta pin. Libung beses sibukan tana umulit, na samasnan itang gulu tamu, ot itang pagkakataun ay ta sinuku ka? Ot e mu ku peglaban? Sabi mu ale, alang magbayu? O neng nang milyari? Nang migbayu? Eku balung sabyan.

Karakal na megbayu keng kilub ning adwang banua. Detang planu tamu, hangga na la talagang planu. Ala na ka, e naka magbalik.